काठमाडौं, ३० जेठ – विपि राजमार्गमा बस र मालवाहक सवारी साधन नचल्दा त्यस क्षेत्रका जिल्लाबासी प्रभावित भएको भन्दै संसदमा वहस भएको छ । 
बुधबार व्यवस्थापिका संसदको विशेष समयमा बोल्दै सांसद गणेश  पहाडीले विपि राजमार्गमा ठूला सवारी साधन चलाउन रोक लगाँउदा भएको सास्तीको विषयमा सरकारको ध्यानाकर्षण गराउनुभएको हो । 

कुनै पनि विषयमा निर्णय लिंदा त्यसको प्रभावको अध्ययन र मुल्यांकन गर्न पनि सांसद पहाडीले सरकारलाई सचेत गराउनुभएको हो  । विपी राजमार्गमा मालवाहक बस र यात्रु बस चल्न रोक लगाउने सर्वोच्च अदालतको अन्तरिम आदेशका कारण केही दिन देखि सिन्धुली, रामेछाप, ओलखढुङा, दोलखा, सोलु लगायतका बासिन्दाको जनजिवन अस्तव्यस्त हुनुको साथै मंहगी बढेको भन्दै उहाँले त्यस तर्फ सरकारको ध्यानाकर्षण गराउनुभयो ।

विपि राजमार्गमा सवारी संचालनमा रोक लगाए लगत्तै ग्रामीण कच्ची सडकमा समेत साना गाडी चल्न नसक्ने अवस्थाका कारण सिन्धुलीको सदरमुकाम र ९ वटै स्थानीय तहसंगको सम्बन्ध र सम्पर्क विच्छेद भएको भन्दै उहाँले विवेकपुर्ण निर्णयका लागि सरकारको ध्यानाकर्षण गराउनुभयो ।  उहाँले भन्नुभयो ‘अहिले सिन्धुलीका जनताहरु प्रश्न गरिरहेका छन् । के राजमार्ग भनेको सेल्फि खिच्न र फिल्म सुटिङ गर्नका लागि मात्रै हो ? कि यातायात चल्नका लागि पनि हो ?’

सवारी साधन संचालनमा रोक लगाउने निर्णयले वर्तमान सरकारको नीति तथा कार्यक्रममा समावेश १ बर्ष भित्र भुकम्प पीडितलाई छानो मुनि ल्याउने र राष्ट्रिय गौरवको आयोजना मध्यपहाडी लोकमार्ग ५ बर्ष भित्र सम्पन्न गर्ने भनि गरेको संकल्प पुरा हुन नसक्ने पहाडिले ठोकुवा गर्नुभयो ।

व्यवस्थापिका, कार्यपालिका र न्यायपालिका विकासमैत्री हुन सकेनन् भने सम्वृद्धि सम्भव नहुने भन्दै उहाँले सभामुख मार्फत सरकार संगै राज्यका सबै निकायको ध्यानाकर्षण गराउनुभयो । राजमार्गमा ठूला सवारीमा रोक लगाएसँगै आज बाटै रामेछापका व्यवसायीहरु आन्दोलित भएका छन् । उनीहरुले आज आदलतको निर्णयले सास्ती खेप्नु परेको भन्दै राजमार्ग अवरुद्घ समेत गरेका छन् ।