काठमाडौँ, २१ कात्तिक - मलेसियामा हुने एशिया कप उन्नाइस वर्षमुनि –यू–१९) क्रिकेट प्रतियोगितामा लागि नेपाली युवा टोलीले भाग लिने भएको छ । पन्ध्र खेलाडीसहित २० सदस्यीय नेपाली टोली प्रतियोगिताको तयारीका लागि बंगलादेशमा पुगी तीन अभ्यास खेल खेलेर सोमबार मात्र नेपाल आइपुगेको टेक्निकल एनालिष्ट रमन शिवाकोटीले जानकारी दिनुभयो । 

सहभागी खेलाडीमा कप्तान दीपेन्द्रसिंह ऐरीसहित सन्दीप लामिछाने, असिफ शेख, अनिलकुमार शाह, पवन सर्राफ, सन्दीप सुनुवार, रोहितकुमार पौडेल, किशोर महतो, प्रनीत थापा मगर, साहब आलम, कमल सिंह, प्रकाश केसी, जीतेन्द्र सिंह, भीम सार्की र रसिद खान छन् । 

टोलीका मुख्य प्रशिक्षकमा विनोद दास र सहायक प्रशिक्षक कलम अली छन् । नेपालले आफ्नो पहिलो खेल यही कात्तिक २५ गते बंगलादेशसँग प्रतिस्पर्धा गर्दै प्रतियोगिताको उद्घाटन गर्नेछ । त्यसैगरी दोस्रो खेल कात्तिक २६ गते भारतसँग तथा समूह चरणको अन्तिम खेलमा कात्तिक २८ गते आयोजक मलेसियाको सामना गर्नेछ । 

प्रतियोगितामा नेपाल समूह ‘ए’ मा छ । नेपालको समूहमा आयोजक मलेसियासहित बंगलादेश र भारत तथा समूह ‘बी’ मा पाकिस्तान, श्रीलंका र अफगानिस्तान छन् । गत महिना मलेसियामा नै भएको इस्टर्न रिजन च्याम्पियनसिपमा नेपाल च्याम्पियन बन्दै यू–१९ एसिया कपका लागि छनोट भएको हो । 

शिवाकोटी र पाठक विजयी 
भक्तपुर – हर्षचोक ब्याडमिण्टन क्लबको आयोजनामा भएको ब्याडमिण्टन प्रतियोगिताको उपाधि सुुशील शिवाकोटी र धु्रव पाठक जोडीले हात पारेको छ । 

सात टोलीले भाग लिएको प्रतियोगितामा विश्वराम खड्का र मेहन गुरुङको जोडीलाई सो जोडीले पराजित गरेको थियो । प्रतियोगितामा लक्ष्मीराज अधिकारी र अमित कार्कीको जोडीले कैलाश खड्का र गोपाल सुवेदीको जोडीलाई पाखा लगाउँदै तेस्रो स्थान हात पारेको थियो । 

विजयी खेलाडीलाई पुनरावेदन अदालत पाटनका न्यायाधीश विनोदप्रसाद शर्माले नगद पुरस्कार र प्रमाणपत्र प्रदान गर्नुभयो । क्लबले आफ्ना सदस्यलाई एक एक जोर ट्रयाक सुटसमेत वितरण गरेको थियो । 

रासस